Íbúafundur um sameiningartillögu

Boðað er til íbúafundar til kynningar á tillögu samstarfsnefndar um sameiningu Eyja- og Miklaholtshrepps og Snæfellsbæjar, sem kosið verður um þann 19. febrúar næstkomandi. Íbúafundurinn verður haldinn fimmtudaginn 27. janúar kl. 20.30 til 22.00, en í ljósi samkomutakmarkana verður fundurinn haldinn á fjarfundarkerfinu zoom.

Tengill inn á fundinn er aðgengilegur hér.

Á fimmtudaginn kl. 16 er íbúum boðið að prófa að skrá sig inn á ZOOM og læra á umhverfið.

Samstarfsnefndin hvetur íbúa beggja sveitarfélaga að fjölmenna á íbúafundinn og kynna sér tillögu nefndarinnar. Notast verður við samráðskerfið menti.com þar sem hægt er að koma ábendingum, athugasemdum og spurningum á framfæri við nefndina. Auk þess verður fundarfólki boðið að taka til máls og lýsa sínum sjónarmiðum. 

Kynningarbæklingur um framtíðarsýn í sameinuðu sveitarfélagi má finna hér.

Leiðbeiningar til að tengjast Zoom

Hægt er að fylgjast með og taka þátt í hvaða snjalltæki sem er. Besta upplifunin fæst ef fylgst er með í tölvu. Gott er að setja Zoom-hugbúnaðinn upp á þá tölvu eða snjalltæki sem þú ætlar að nota tímanlega áður en fundurinn hefst. Þau sem eru þegar búin að setja upp Zoom á sínum vélum eru beðin um uppfæra í nýjustu útgáfu til að fá bestu virkni í umræðuhópum.

Zoom fyrir borðtölvur er á síðunni https://zoom.us/download en Zoom-smáforrit fyrir Android snjalltæki eru á Play Store og á App Store fyrir iPhone og iPad. Einnig er hægt að nota vefviðmót fyrir Zoom (Zoom Web Client) en virkni þess er takmarkaðri en virkni þess hugbúnaðar sem settur er upp á snjalltækinu.

Við mælum með að fólk mæti snemma fyrir framan skjáinn svo tími gefist til að bregðast við tæknilegum vandkvæðum sem geta komið upp við innskráningu. Aðgætið að heyrnartól og hljóðnemi séu tengdir við tölvuna/snjalltækið og virki sem skyldi. Í umræðum er gott að þátttakendur séu með virka myndavél og sjái hver annan.

Þátttakendur eru beðnir um að skrá fornafn við myndina. Það er gert með því að smella á punktana þrjá sem birtast þegar bendillinn er dreginn yfir myndina sína og velja "rename".

Ef þú ert með veika tengingu á þráðlausu neti þá mælum við með að þú tengir þig með netsnúru.